嗯…近日發覺自己好蕩失左路咁，成日唔知自己喺度做乜，又或者唔知自己行緊去邊度咁…
本來返返黎香港之後要諗前途問題已經好煩
要煩下究竟轉唔轉工好呢、讀唔讀碩士好呢、點儲錢先好呢、點先可以上到車呢、點先可以同以前嘅朋友混熟啲呢、點先可以建構返香港生活呢、點先可以減肥呢、點先可以個人唔好成人咁攰呢、點先可以迫到自己出街呢、點先可以有效地理財錢滾錢呢…
點知依家另一半喺外國，咁就仲麻煩…
究竟佢黎香港住定我去歐洲好呢、如果佢黎香港住得我份人工頂唔頂得住呢、我有心理準備陪佢捱窮未呢、如果我去歐洲咁我係咪應該去讀一科高增值易搵到錢嘅工呢、點個國家適合我地定居呢、點樣可以申請到居權呢、為左居權而結婚咁將來唔夾我地點算好呢、係咪有情飲水飽呢、係咪有心理準備放棄我嘅專業同讀左咁多年嘅屎片呢等等等…
然之後喺問題天天都多嘅上面再加隻疑似黑狗嘅存在，就令所有野變得更加複雜呢……
還是係我庸人自擾呢…唉…
本人絕對係上一代口中嘅廢青…
儲到嘅車都去哂機票度所以儲唔到錢買樓。又怕蝕錢所以從來無買過股票，連iPhone 都無炒過。又，從大學畢業起就無打死一間公司成日轉工…
嗯…不過呢，回望返以前做過嘅工，我會覺得我將來可能會係一個幾好嘅說書人。我以前做過…
作為一個本土80後，喺美、英、德、法同香港都打過工，唔係大富大貴不過有咁嘅人生成績表算係不過不失喇瓜~
上年今日
我揹住1x 公斤重嘅背包，外加兩碌行山杖，由St. Jean Pied De Port 開始行我嘅Camino France.
時間過得真係快，眨下眼咁話過左一年。依家回頭望返，都好佩服有得坐就唔會企，有得瞓就唔會坐嘅本人可以行足九百公里去西班牙。
雖然經此一役我千金散盡到無得坐西伯利亞鐵路返香港、腳瓜仲粗過黎根，不過都係值得架!
終於我又返到啲個blog 喇
以前成日覺得啲所謂嘅旅遊blogger求其去一次歐遊做一次背包客就話自己係旅遊達人出個blog然後又出書又接受訪問乜乜七七好易，依家先知道原來無一定程度嘅自律，由其是懶人如我，就算只係經營一個淨係俾自己睇嘅blog 都原來都幾難…
今次又睇下我堅持到幾耐…
又
以前初開時仲諗住要中英對照先吸引多啲人睇。
然而，從英國返香港之後英文大退步嘅我，都係慳返啖氣寫返母語罷啦
Buen Camino! 